ਭਾਰਤ ਦੀ ਸਵਦੇਸ਼ੀ ਪਰਮਾਣੂ ਪਣਡੁੱਬੀ ਆਈ.ਐਨ.ਐਸ. ਅਰਿਦਮਨ ਅੱਜ ਭਾਰਤੀ ਜਲ ਸੈਨਾ ਵਿਚ ਹੋਵੇਗੀ ਸ਼ਾਮਿਲ

ਨਵੀਂ ਦਿੱਲੀ, 3 ਅਪ੍ਰੈਲ- ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਅੱਜ ਭਾਰਤ ਦੀ ਸਵਦੇਸ਼ੀ ਪਰਮਾਣੂ ਪਣਡੁੱਬੀ ਆਈ.ਐਨ.ਐਸ. ਅਰਿਦਮਨ ਨੂੰ ਭਾਰਤੀ ਜਲ ਸੈਨਾ ਵਿਚ ਸ਼ਾਮਿਲ ਕਰਨਗੇ। ਇਹ ਦੇਸ਼ ਦੀ ਤੀਜੀ ਸਵਦੇਸ਼ੀ ਤੌਰ 'ਤੇ ਬਣੀ ਪਰਮਾਣੂ-ਸੰਚਾਲਿਤ ਬੈਲਿਸਟਿਕ ਮਿਜ਼ਾਈਲ ਪਣਡੁੱਬੀ ਹੈ। ਇਸ ਦੇ ਨਾਲ ਹੀ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਐਕਸ 'ਤੇ ਲਿਖਿਆ ਕਿ 'ਅਰਿਦਮਨ' ਇਕ ਸ਼ਬਦ ਨਹੀਂ ਸਗੋਂ ਇਕ ਸ਼ਕਤੀ ਹੈ।

ਪਾਣੀ ਦੇ ਅੰਦਰ ਲਗਭਗ 44 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਚੱਲਦੇ ਹੋਏ ਅਰਿਦਮਨ ਦਾ ਪਤਾ ਲਗਾਉਣਾ ਬਹੁਤ ਮੁਸ਼ਕਿਲ ਹੈ। ਅਰਿਦਮਨ ਦੇ ਸ਼ਾਮਿਲ ਹੋਣ ਤੋਂ ਬਾਅਦ, ਕੇ-15 ਅਤੇ ਕੇ-4 ਵਰਗੀਆਂ ਘਾਤਕ ਬੈਲਿਸਟਿਕ ਮਿਜ਼ਾਈਲਾਂ ਨਾਲ ਲੈਸ, ਇਹ ਪਹਿਲਾ ਮੌਕਾ ਹੋਵੇਗਾ ਜਦੋਂ ਜਲ ਸੈਨਾ ਕੋਲ ਇਕੋ ਸਮੇਂ ਤਿੰਨ ਸਰਗਰਮ ਪਰਮਾਣੂ-ਸੰਚਾਲਿਤ ਬੈਲਿਸਟਿਕ ਮਿਜ਼ਾਈਲ ਪਣਡੁੱਬੀਆਂ ਹੋਣਗੀਆਂ। ਦੁਸ਼ਮਣ ਨੂੰ ਤਬਾਹ ਕਰਨ ਵਾਲੀ ਪਣਡੁੱਬੀ, ਅਰਿਦਮਨ, ਭਾਰਤ ਦੀ ਪ੍ਰਮਾਣੂ ਰੋਕਥਾਮ ਅਤੇ ਹਮਲੇ ਦੀ ਸਮਰੱਥਾ ਨੂੰ ਕਾਫ਼ੀ ਵਧਾਏਗੀ।