ਸਵਾ ਕਿੱਲੋ ਚਰਸ ਤੇ 1 ਲੱਖ ਦੀ ਨਕਦੀ ਸਣੇ ਇਕ ਕਾਬੂ

ਪਠਾਨਕੋਟ, 7 ਅਪ੍ਰੈਲ (ਵਿਨੋਦ)-ਪੰਜਾਬ-ਹਿਮਾਚਲ ਪ੍ਰਦੇਸ਼ ਸਰਹੱਦ 'ਤੇ ਪਠਾਨਕੋਟ-ਮੰਡੀ ਰਾਸ਼ਟਰੀ ਰਾਜਮਾਰਗ 'ਤੇ ਚੱਕੀ ਪੁਲ ਨੇੜੇ ਨਾਕਾਬੰਦੀ ਦੌਰਾਨ, ਪੁਲਿਸ ਚੌਕੀ ਕੰਡਵਾਲ ਦੀ ਇਕ ਟੀਮ ਨੇ ਇਕ ਕ੍ਰੇਟਾ ਕਾਰ ਵਿਚੋਂ ਇਕ ਕਿਲੋ, 256 ਗ੍ਰਾਮ ਚਰਸ ਤੇ ਇਕ ਲੱਖ ਨਕਦੀ ਬਰਾਮਦ ਕਰਕੇ ਇਕ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।

ਜਾਣਕਾਰੀ ਦਿੰਦੇ ਹੋਏ, ਪੁਲਿਸ ਸੁਪਰਡੈਂਟ ਕੁਲਭੂਸ਼ਣ ਵਰਮਾ ਨੇ ਦੱਸਿਆ ਕਿ 6 ਅਪ੍ਰੈਲ ਦੀ ਰਾਤ ਨੂੰ, ਲਗਭਗ 8:55 ਵਜੇ, ਪੁਲਿਸ ਚੌਕੀ ਕੰਡਵਾਲ ਦੀ ਟੀਮ ਨੂੰ ਐਨ ਐਚ -154 (ਮੰਡੀ-ਪਠਾਨਕੋਟ ਸੜਕ) 'ਤੇ ਟ੍ਰੈਫਿਕ ਜਾਂਚ ਲਈ ਤਾਇਨਾਤ ਕੀਤਾ ਗਿਆ ਸੀ। ਜਦੋਂ ਜਸੂਰ ਤੋਂ ਪਠਾਨਕੋਟ ਆ ਰਹੀ ਇਕ ਕਾਲੇ ਰੰਗ ਦੀ ਕ੍ਰੇਟਾ ਕਾਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ ਗਿਆ, ਤਾਂ ਡਰਾਈਵਰ ਨੇ ਪੁਲਿਸ ਪਾਰਟੀ ਨੂੰ ਦੇਖ ਕੇ ਭੱਜਣ ਦੀ ਕੋਸ਼ਿਸ਼ ਕੀਤੀ। ਉਸਦੀ ਹਰਕਤ 'ਤੇ ਸ਼ੱਕ ਹੋਣ 'ਤੇ, ਪੁਲਿਸ ਟੀਮ ਨੇ ਤੇਜ਼ੀ ਨਾਲ ਕਾਰਵਾਈ ਕੀਤੀ ਅਤੇ ਗੱਡੀ ਨੂੰ ਘੇਰ ਲਿਆ । ਸੁਤੰਤਰ ਗਵਾਹਾਂ ਦੀ ਮੌਜੂਦਗੀ ਵਿਚ ਗੱਡੀ ਦੀ ਪੂਰੀ ਤਲਾਸ਼ੀ ਲੈਣ 'ਤੇ ਇਕ ਬੈਗ ਮਿਲਿਆ। ਬੈਗ ਦੀ ਤਲਾਸ਼ੀ ਲੈਣ 'ਤੇ, ਪੁਲਿਸ ਟੀਮ ਨੇ 1 ਕਿਲੋ 256 ਗ੍ਰਾਮ ਚਰਸ ਬਰਾਮਦ ਕੀਤੀ। ਇਸ ਤੋਂ ਇਲਾਵਾ ਬੈਗ ਦੀ ਜੇਬ ਵਿੱਚੋਂ ਇਕ ਲੱਖ ਰੁਪਏ ਦੀ ਭਾਰਤੀ ਕਰੰਸੀ ਬਰਾਮਦ ਕੀਤੀ ਗਈ। ਦੋਸ਼ੀ ਨੂੰ ਤੁਰੰਤ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਗ੍ਰਿਫ਼ਤਾਰ ਵਿਅਕਤੀ ਦੀ ਪਛਾਣ ਰਾਮ ਕੁਮਾਰ (52 ਸਾਲ) ਵਜੋਂ ਹੋਈ, ਜੋ ਤਹਿਸੀਲ ਕੁਮਾਰਸੈਨ, ਜ਼ਿਲ੍ਹਾ ਸ਼ਿਮਲਾ (ਹਿਮਾਚਲ ਪ੍ਰਦੇਸ਼) ਦਾ ਰਹਿਣ ਵਾਲਾ ਹੈ। ਪੁੱਛਗਿੱਛ ਤੋਂ ਪਤਾ ਲੱਗਾ ਕਿ ਮੁਲਜ਼ਮ ਕੁੱਲੂ-ਮਨਾਲੀ ਖੇਤਰ ਵਿਚ ਇਕ ਢਾਬਾ ਚਲਾਉਂਦਾ ਹੈ। ਪੁਲਿਸ ਨੇ ਮੁਲਜ਼ਮ ਵਿਰੁੱਧ ਐਨਡੀਪੀਸੀ ਐਕਟ ਦੀ ਧਾਰਾ 20 ਅਤੇ 25 ਤਹਿਤ ਕੇਸ ਨੰਬਰ 95/2026 ਦਰਜ ਕੀਤਾ ਹੈ।